श्याम जयंती आई, म्हारे मन में उठे हिलोर,
खाटू से थांने आणो है, मित्र मंडल की ओर ।। टेर ।।
तर्ज – सावन का महीना ।
उत्सव की बाबा थारे करली तैयारी,
लीले की श्याम अब तो करल्यो सवारी,
बाट उड़ीका म्हे तो, निहाराँ चारू ओर, खाटूँ से थांने …. ।। १ ।।
चन्दन की चौकी बाबा, थांने बिठावां,
गंगाजल सूं स्नान करावां,
रंग रंगीलो बागो, ज्यामें गोटा की है डोर, खाटूँ से थांने …. ।। २ ।।
फूलाँ से बाबा थारी झांकी सजावां,
केसर चन्दन को तिलक लगावां,
ज्योत जगावां थारी महके है ईत्तर जोर, खाटूँ से थांने …. ।। ३ ।।
भगतां के सागे म्हे तो हिलमिल गावाँ,
श्याम धणी ने भजन सुणावाँ,
कीर्तन में म्हारे आवो, म्हारे कालजे की कोर, खाटूँ से थांने …. ।। ४ ।।
‘श्याम मित्र मण्डल’ स है नातो पुराणो,
सब भगतां ने अब तो कीर्तन मं आणो,
म्हारी जीवन नैया की श्याम के हाथां डोर, खाटूँ से थांने …. ।। ५ ।।
