पीला रे पीला, कांईं करो सहेल्यूं ए,
पीला म्हारै बाबाजी रा बेस, सहेल्यूं ए,
ओ तो राजा भीमसेन रो लाल।।
कालो जी कालो, कांईं करो सहेल्यूं ए,
काला म्हारै बाबाजी रा केस, सहेल्यूं ए,
ओ तो राजा भीमसेन रो लाल।।
तीखा जी तीखा, कांईं करो सहेल्यूं ए,
तीखा म्हारै बाबाजी रा नैंण, सहेल्यूं ए,
ओ तो राजा भीमसेन रो लाल।।
केसरिया केसरिया, कांईं करो सहेल्यूं ए,
माथे तिलक लगाए बाबो श्याम, केसरियो रे,
ओ तो राजा भीमसेन रो लाल।।
लीलो जी लीलो, कांईं करो सहेल्यूं ए,
लीलो म्हारै बाबै रो तुरंग, सहेल्यूं ए,
ओ तो राजा भीमसेन रो लाल।।
इंद्रधनुष भी, शरमावे सहेल्यो रे,
देख श्याम को बागो नित कई बार, सहेल्यूं ए,
ओ तो माता एहलवती रो लाल।।
हरियो जी हरियो, कांईं करो सहेल्यूं ए,
हरी म्हारै बाबाजी री बैंण, सहेल्यूं ए,
ओ तो राजा भीमसेन रो लाल।।
धोला जी धोला, कांई करो सहेल्यूं ए,
धोला म्हारै बाबाजी रा दांत, सहेल्यूं ए,
ओ तो राजा भीमसेन रो लाल।।
चालो नीं चालो, श्याम धणी रै द्वारां ए,
करसी बाबो थारा बेड़ा पार, तो चालो नीं,
चालो चालां बाबाजी रै द्वार।।
देस ढुण्ढारां राज करै है,
पूरण सब रा काज करै है,
एक’र तो चालो म्हारे साथ, तो चालो नीं,
चालो चालां बाबाजी रै द्वार।।
पीला रे पीला, कांईं करो सहेल्यूं ए,
पीला म्हारै बाबाजी रा बेस, सहेल्यूं ए,
ओ तो राजा भीमसेन रो लाल।।
